کیپ ٹاؤن ٹیسٹ: قومی ٹیم کو شکست، سیریز جنوبی افریقا کے نام

جنوبی افریقا کی ٹیم نے پاکستان کو دوسرے ٹیسٹ میں 9 وکٹوں سے باآسانی شکست دے کر سیریز میں فیصلہ کن برتری حاصل کرلی۔

تفصیلات کے مطابق کیپ ٹاؤن میں کھیلے جانے والے ٹیسٹ میچ میں جنوبی افریقا کی ٹیم نے 41 رنز ہدف کے تعاقب میں بیٹنگ کا آغاز کیا اور ایک وکٹ کے نقصان پر پورا کرلیا۔

قومی کرکٹ ٹیم کے محمد عباس وہ واحد باؤلر تھے جنہوں نے ڈی برائن کی وکٹ لی جبکہ افریقی بلے باز ہاشم آملہ محمد عامر کی گیند لگنے سے زخمی بھی ہوئے۔

میزبان ٹیم نے مقررہ ہدف 9.5 اوورز میں ایک وکٹ کے نقصان پر حاصل کیا، جنوبی افریقہ کو تین ٹیسٹ میچز کی سیریز میں 0-2کی ناقابل شکست برتری حاصل ہوگئی۔

ڈوپلسی کو شاندار بیٹنگ اور سنچری بنانے پر مین آف دی میچ کا ایوارڈ دیا گیا۔

پانچ روزہ ٹیسٹ کا نتیجہ ڈھائی دن میں ہی نکل آیا، پاکستان کے بلے باز دوسری اننگز میں بھی متاثر کن کارکردگی نہ دکھا سکے۔ قومی کرکٹ ٹیم کے کپتان نے شکست کا ملبہ بیٹنگ لائن پر ڈال دیا۔

جنوبی افریقا کی ٹیم نے کیپ ٹاؤن اور سینچورین میں فتح حاصل کر کے سیریز اپنے نام کرلی، تیسرا ٹیسٹ 11 جنوری سے جوہانسبرگ میں کھیلا جائے گا۔

یاد رہے کہ قومی ٹیم دوسری اننگز میں 294 رنز بنا کر آؤٹ ہوئی تھی جس کے بعد میزبان ٹیم کو جیت کے لیے 41 رنز کا ہدف ملا تھا، پاکستان کی جانب سے شان مسعود نے 61، اسد شفیق نے 88 اور بابراعظم نے 72 رنز کی اننگز کھیلی تھی۔

مڈل آرڈر کی نصف سنچریوں کے علاوہ کوئی پاکستانی بلے باز خاطر خواہ کارکردگی نہ دکھا سکا، امام الحق 6، اظہر علی 6، فخر زمان 7، کپتان سرفراز احمد 6 رنز بنا کر پویلین لوٹے تھے۔

دوسری اننگز میں جنوبی افریقا کے فاسٹ بولر ڈیل اسٹین اور ربادا نے 4، 4 وکٹیں حاصل کیں جبکہ فلینڈر اور اولیویئر کے حصے میں ایک، ایک وکٹ آئی۔

قبل ازیں جنوبی افریقہ نے 382 رنز 6 کھلاڑیوں کے نقصان پر اننگز دوبارہ شروع کی تو وکٹ کیپر بلے باز ڈی کوک 59 رنز بنا کر پویلین لوٹ گئے اس کے بعد جنوبی افریقہ کی پوری ٹیم 431 رنز بنا کر آؤٹ ہوگئی۔

پاکستان کی جانب سے محمد عامر اور شاہین شاہ آفریدی نے چار، چار کھلاڑیوں کو پویلین کی راہ دکھائی، محمد عباس، شان مسعود نے ایک ، ایک وکٹ حاصل کی۔

یاد رہے کہ جنوبی افریقہ نے پہلے ٹیسٹ میچ میں 6 وکٹوں سے کامیابی حاصل کی تھی اور ان کی اس جیت میں 11 وکٹیں لے کر مرکزی کردار ڈوئن اولیوئیر نے ادا کیا تھا۔

جواب چھوڑیں

آپ کا ای میل ایڈریس شائع نہیں کیا جائے گا.